48 • SAMEFOLKET OMVÄRLDEN “Iemeálmmugij nanos ja tjiegŋalis máhtudahka máhttá doarjjot ienep åvtårádak Australiav” Public service- vidnudagán ABC Australian vájvástuvvin iemeálmmuga rasismas juogu barggoguojmijs, gähttjijs ja gulldaliddjijs. Kelly Williams ja Solua Middletona ámmát la vaj vuosteldit dav vuogev ja rasismav. Dat la rahpam uvsav ulmutjijda iemeálmmugijs njunjojvirgijda ja aj ienep subttsasijda iemeálmmugijs prográmmafállamijs. TJÁLOS CHRISTIN SANDBERG GÅVVÅ ABC – MIJ SIHTAP vaj iemeálmmugij giella ja kultuvrra galggá årrot oasse nasjonála ságastallamijn Australian. Vaj ulmutja galggi dåbdåt histåvråv sajijn gånnå årru, namáv ja aj sisano namáv. Dav giehttu Kelly Williams, gut la vuostasj iemeálmmukdirektera Australias public service-vidnudagán ABC. Sån gullu bandjalung- álmmugij ja suv barggodåjmajda gullu váldet åvdåsvásstádus vaj lasedit iemeálmmukoassálasstemav juogu dal vidnudagán ja aj radio- ja TV fálaldagájn. Gå Samefolket åledi suv telefåvnåjn de gulluji låtte ma vitsárdi jieddnát dåp duogen. Svierigin la dálvve ja idet. – Akta gássjelisvuohta sissŋel media la vaj danna la nåv vádne barggijs ma li iemeálmmugijs. Mån sidáv årrot viehkken lasedit barggijt ma gulluji iemeálmmugijda, vaddet sidjij ienep åvdåsvásstádusáv ja åttjudit sijájt njunjojdåjmajda, giehttu Kelly Williams. Akta dajs ulmutjijs majt sån la doarjjum ja åvdedam la Solua Middleton, sån la dat vuostasj dan ådå virgen degu jådediddjen iemeálmmukradion. – Dahkat TV:av ja radiov sisadná dav vaj giehttot subttsasijt ållu ja moatte láhkáj. Muv ámmát la låbddit iemeálmmukjienajt, juogu dal vidnudagán ja dav majt sáddip. Dán biejve miján li guokta prográmma majt sáddip, valla mån sidáv vaj da lassáni ja aj sidáv vuojnnet ådå ábnnasijt ja vuojnojt, giehttu Solua Middleton. AUSTRALIAN gávnnuji guokta iemeálmmukjuohkusa: Aboriginera ja torres strait islandera, ja Solua Middleton gullu dan maŋep álmmugij. Åvddål gå sån oattjoj dálásj dievnov sån anij åvdåsvásstádusáv biedjat mannuj mediabielev Deep time, gånnå akta gut máhttá gähttjat ja vuojnnet Australia iemeálmmuga väráldav mállagijn, interaktijvva kártajt ja histåvrålasj subttsasijt, sajijt ja kultuvrav. – Deep time la dat vuodohiståvrrå Australian majt gájkka lulun diehtet ja dåbddåt. Mij lip barggam ulmutjij ålles rijkas gudi adni máhtov árbben ja mij la mannam buolvas buolvaj. Sijá subttsasa ja máhto li buktám ábnnasijt ma ålov addnuji skåvlåjn miehtáj rijka, mujttal Solua Middleton. Ulmme daj ábnnasij la vaddet iemeálmmuga vuojnov dasi masi la dárbbo rijkan. Gåk sij barggi ássjij degu sosiála njuolggavuodajn, varresvuodajn ja tjáhtje- ja birássuojijn miehtáj rijka. – Mij dárbahip sjaddat buorebu subtsastit dajt buorijt giehtojt ja majt iemeálmmuga li dahkam Australian, javllá Kelly Williams ja joarkká: – Lahka aktavuohta histåvrråj, kultuvrraj ja lahkasebrudahkaj danna gånnå mij viessop la márjju dat ájnna mij tjadná mijájt aktij väráldin mij ietján rahtas, hájijt ja ietjas sårmme. Moadda jage ájgge de Kelly Williams ja Solua Middleton lijga mielan ja dåjmalattja dahkat sisguoradallamav ABC:an. Gålgådismáno 2024 almoduváj boados sisrappårtån. – Danna vuojnnusit bigoduváj vaj mijá bargge ma gulluji iemeálmmugijda li årrum vájvedum rasismas juogu dal barggosajen ja almulattjat sijá bargon degu journalistan, giehttu Kelly Williams. Degu iemeálmmukdirekteran sån la ássam vuogijt vaj oadtjot buorep barggobirrusav dimna barggijda mediavidnudagán. – Dálla gájka ABC:an diehti vaj jus mij barggap iemeálmmuksubttsasij jali iemeálmmukprosjevtaj de la, ja galggá årrot iemeálmmugijs barggojådediddje – juska ulmme l vaj gájkka journalista galggi adnet máhtudagáv barggat iemeálmmuksubttsasij.
RkJQdWJsaXNoZXIy MzE5MDM=